ᐅᑭᐅᖅᑕᖅᑐᒥ ᐊᔾᔪᒥᓇᖅᑐᓄᑦ ᓵᓚᖃᐅᓯᐊᖅᑎᑦᑎᕙᑦᑐᑦ ᐃᑲᔫᑎᔅᓴᓂᑦ ᐸᐸᑦᑎᔩᑦ ᖁᕕᐊᓱᓪᓚᕆᑦᑐᑦ ᓇᓗᓇᐃᕐᓯᔭᕆᐊᔅᓴᖅ ᔮᔅᒥᓐ ᕋᑦᕗᓐ ᐃᓚᒋᔭᐅᓕᕐᖓᑦ ᓵᓚᖃᐅᓯᐊᖅᑎᑦᑎᕙᑦᑐᓄᑦ ᐱᓕᕆᐊᕐᒥ ᓯᕗᓪᓕᕐᐹᒥ ᐊᐅᓚᑦᑎᔨᒻᒪᕆᐅᓂᐊᖅᑐᓂ.
ᕋᑦᕗᓐ ᓄᓇᓕᓐᓂᑦ−ᐋᖅᑭᔅᓱᐃᔨ ᐊᖏᕐᓯᒪᑦᑎᐊᖅᑐᓂ ᓯᕗᒧᐊᑦᑎᑦᑎᕙᓪᓕᐊᒍᒪᓂᕐᒧᑦ ᐅᔾᔨᕈᓱᑦᑎᑦᑎᕙᓪᓕᐊᓂᕐᒥᒃ ᐊᒻᒪᓗ ᑕᑯᔅᓴᐅᑎᑦᑎᒋᐊᒃᑲᓂᕐᓂᕐᒥᒃ ᐊᔾᔨᒋᔭᐅᙱᑦᑐᒥᒃ ᐱᐅᓯᖃᕐᓂᖏᓐᓂᒃ ᐅᑭᐅᖅᑕᖅᑐᒥ, ᐅᑯᐊ ᐃᓄᐃᑦ ᐊᒻᒪᓗ ᐊᓪᓚᐃᑦ. ᐃᖅᑲᓇᐃᔮᖃᖃᑦᑕᕐᓯᒪᔪᖅ ᓯᕗᓕᖅᑎᐅᓂᕐᒥᒃ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᓕᕆᓂᕐᒥᒃ, ᓴᓇᐅᒐᓕᕆᓂᕐᒥᒃ ᐃᓕᖅᑯᓯᓕᕆᓂᕐᒥᓪᓗ, ᐊᒻᒪᓗ ᐋᓐᓂᐊᖅᑐᓕᕆᓂᕐᒥᒃ, ᐅᓇ ᐃᓚᒋᔭᐅᓪᓗᓂ ᐋᖅᑭᒋᐊᒃᑲᐃᔨᓄᑦ ᐃᔅᓯᕙᐅᑕᐅᓪᓗᓂ ᓄᓇᕗᒻᒥ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᐋᖅᑭᒋᐊᒃᑲᐃᔩᑦ, ᐊᒻᒪᓗ ᒫᓐᓇᕋᑖᖑᓯᒪᔪᖅ ᒪᓕᒐᓕᕆᔨᐅᔪᔪᖅ ᒪᓕᒐᓕᕆᔨᒃᑯᑦ ᑲᑎᒪᔨᖏᓐᓂᑦ ᓄᓇᕗᒻᒥ. ᐱᔭᕇᕐᓯᓯᒪᔪᖅ ᒪᓕᒐᓕᕆᓂᕐᒧᑦ ᐃᓕᓐᓂᐊᓂᕐᒥᒃ ᓯᓚᑦᑐᓴᕐᕕᔾᔪᐊᖓᓂ ᓴᔅᑳᑦᑐᐊᓐ.
“ᔮᔅᒥᓐ ᑐᓂᓯᒪᑦᑎᐊᖅᑐᓂ ᓯᕗᓕᖅᑎ ᓄᓇᖓᓐᓂ ᐊᒻᒪᓗ ᓂᐱᒋᔭᐅᖃᑦᑕᓂᕐᒧᑦ ᐃᑲᔪᕐᓱᐃᓪᓗᓂ ᐅᑭᐅᖅᑕᖅᑐᒥ. ᖁᕕᐊᓱᓪᓚᕆᑦᑐᒍᑦ ᐃᓚᒋᔭᐅᓂᐊᓕᕐᖓᑦ ᓵᓚᖃᐅᓯᐊᖅᑎᑦᑎᕙᑦᑐᓂᑦ ᐃᑲᔪᕐᓂᐊᕐᖓᑦ ᐱᔾᔪᑎᑦᑎᓐᓂᒃ ᐊᑐᓕᖅᑎᑦᑎᕙᓪᓕᐊᓂᕐᒥᒃ ᐋᖅᑭᐅᒪᑎᓪᓗᒍ ᐊᒻᒪᓗ ᐊᖏᓪᓕᕙᓪᓕᐊᑎᓪᓗᒍ ᑖᓐᓇ ᐱᒋᐊᕈᑕᐅᕙᑦᑐᖅ ᐱᓕᕆᐊᖅ ᐅᑭᐅᖅᑕᖅᑐᒥᐅᓂᑦ ᐅᑭᐅᖅᑕᖅᑐᒥᐅᓄᑦ ᑐᕌᖓᔪᖅ,” ᐅᖃᖅᑐᖅ ᐅᐊᓕ ᓲᒪᓐ, ᐃᔅᓯᕙᐅᑕᖓᑦ ᓵᓚᖃᐅᓯᐊᖅᑎᑦᑎᕙᑦᑐᑦ ᐸᐸᑦᑎᔨᖏᓐᓂᑦ.
ᕋᑦᕗᓐ ᖃᐅᔨᒪᔭᖅ ᐃᑉᐱᒍᓱᑦᑎᐊᖃᑦᑕᕐᓂᖏᓄᑦ ᐃᓚᒌᓐᓂᕐᒥᒃ ᐊᒻᒪᓗ ᐋᖅᑮᑦᑎᐊᖃᑦᑕᓂᕐᒥᒃ ᐊᔾᔨᒌᙱᑐᒡᒍᙱᓂᑦ ᐃᓅᖃᑎᒌᑉᐸᑦᑐᓂᑦ ᐊᒻᒪᓗ ᐊᑑᑎᕕᐅᕙᑦᑐᓂᑦ ᖃᓄᖅᑑᕈᑎᖃᕐᓂᐊᖅᑐᓂᑦ ᓄᓇᓕᓐᓂᑦ−ᐊᓯᔾᔨᐸᓪᓕᐊᔪᓂᑦ ᐱᓇᓱᐊᕈᑕᐅᕙᑦᑐᓂᑦ. ᐃᓚᖃᐅᑦᑎᐊᕐᓂᖓ ᐅᑭᐅᖅᑕᖅᑐᒥ ᓇᒥᓕᒫᖅ ᐊᑑᑎᖃᑦᑎᐊᙳᓱᑦᑐᖅ ᐃᑲᔪᕐᓗᓂ ᓵᓚᖃᐅᓯᐊᖅᑎᑦᑎᕙᑦᑐᓂᑦ ᑎᑭᐅᑎᑎᑦᑎᓂᕐᒥᒃ ᓄᓇᓕᓐᓄᑦ ᐊᒥᓱᒃᑲᓂᕐᓄᑦ.
“ᖁᕕᐊᓱᓪᓚᕆᑦᑐᖓ ᐊᒻᒪᓗ ᒥᑭᓗᐊᖅᑑᔮᒻᒪᕆᑦᑐᖓ ᐃᓚᒋᔭᐅᓕᕆᐊᔅᓴᖅ ᓵᓚᖃᐅᓯᐊᖅᑎᑦᑎᕙᑦᑐᓄᑦ ᐃᑲᔫᑎᖃᖃᑦᑕᓂᐊᕐᓗᖓ ᐊᑐᓕᖅᑎᑦᑎᕙᓪᓕᐊᑦᑎᐊᕐᓂᖏᓐᓂᒃ ᓵᓚᖃᐅᓯᐊᖅᑎᑦᑎᕙᑦᑐᑦ ᑐᖅᑲᑕᕐᕕᐅᓪᓗᓂ ᐅᑭᐅᖅᑕᖅᑐᒥ ᓄᑖᓂᑦ ᐊᑐᖅᑕᐅᕙᓪᓕᐊᔪᓂᑦ. ᓂᕆᐅᑉᐳᖓ ᐱᔪᓐᓇᕐᓯᑎᑦᑎᕙᓪᓕᐊᓂᐊᓂᕐᒥᒃ ᐱᓕᕆᖃᑎᒌᓐᓂᕆᕙᑦᑕᑎᓐᓂᒃ ᓄᓇᓕᓐᓂᑦ ᐅᑭᐅᑕᖅᑐᒥᐅᓂᑦ ᐊᒻᒪᓗ ᐊᑐᓕᕐᐸᓪᓕᐊᓂᐊᕐᓂᒥᒃ ᑲᓲᒪᖃᑎᖃᕐᓂᕐᒥᒃ ᐊᓪᓚᐃᑦ ᓄᓇᖓᓐᓂ ᐃᑲᔪᖅᑎᐅᖃᑎᒌᑉᐸᑦᑐᓂᑦ.” ᔮᔅᒥᓐ ᕋᑦᕗᓐ.
ᑕᒪᓐᓇ ᐃᖅᑲᓇᐃᔮᖑᕙᑦᑐᖅ ᐃᓚᖃᕐᖓᑦ ᐅᔾᔨᕈᓱᑦᑎᑦᑎᕙᓪᓕᐊᓂᕐᒥᒃ ᓄᑖᖑᓕᖅᑎᓪᓗᒍ ᐅᑭᐅᖅᑕᖅᑐᒥ ᐊᔾᔪᒥᐊᓇᖅᑐᓄᑦ ᐃᓅᓱᑦᑐᓄᑦ ᓵᓚᖃᐅᓯᐊᔅᓴᑦ. ᑕᐃᔭᐃᖃᑦᑕᓚᐅᖅᑐᖅ ᐃᒫᒃ ᐃᓅᓱᑦᑐᓄᑦ ᓵᓚᖃᐅᓯᐊᔅᓴᑦ, ᑖᒃᑯᐊ ᓄᑖᖑᓕᕐᖓᑕ ᓵᓚᖃᐅᓯᐊᔅᓴᑦ ᑐᓂᔭᐅᖃᑦᑕᓂᐊᖅᑐᑦ ᑎᑭᐅᒪᔪᑦ ᐊᒥᓲᓂᓕᓐᓄᑦ $700,000 ᐊᕐᕌᒍᑕᒫᑦ ᐃᓅᓱᑦᑐᓄᑦ ᐱᓕᕆᖃᑎᒌᓄᑦ ᐋᖅᑭᐸᓪᓕᖁᓪᓗᒋᑦ ᐃᓅᓯᖏᑦ ᓄᓇᓕᖏᓐᓂᑦ.
ᑭᖑᓪᓕᕐᒥ ᓵᓚᖃᐅᓯᐊᖅᑎᑦᑎᕙᑦᑐᑦ ᑐᓂᓯᖃᑦᑕᓛᕐᒥᔪᑦ ᑲᑎᓗᑎᒃ ᒪᐃ 7, 2024ᖑᓕᖅᑲᑦ ᐊᑕᐅᑦᑎᒃᑯᑦ ᑲᑎᒪᑎᓪᓗᒋᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᑐᓄᑦ ᐱᕈᕐᐸᓪᓕᐊᑎᑦᑎᓂᕐᒧᑦ ᑲᑎᒪᓂᖓᓐᓂ ᕙᐃᑦHᐅᐊᔅ, ᔫᑳᓐᒥ.
ᐅᑭᐅᖅᑕᖅᑐᒥ ᐊᔾᔪᒥᓇᖅᑐᓂᑦ ᓵᓚᖃᐅᓯᐊᖅᑎᑦᑎᕙᑦᑐᑦ ᒥᔅᓵᓅᖓᔪᑦ
ᐊᖏᓂᕐᐹᒥᒃ ᐊᕐᕌᒍᑕᒫᑦ ᓵᓚᖃᐅᓯᐊᖅᑎᑦᑎᕙᑦᑐᑎᒃ ᑲᓇᑕᒥ, ᐅᑭᐅᖅᑕᖅᑐᒥ ᐊᔾᔪᒥᓇᖅᑐᓂᑦ ᓵᓚᖃᐅᓯᐊᖅᑎᑦᑎᕙᑦᑐᑦ (AIP) ᐱᔪᒐᕐᓴᐃᕙᒻᒪᑕ, ᐱᔪᓐᓇᕐᓯᑎᑦᑎᕙᒻᒪᑕ ᐊᒻᒪᓗ ᖁᕕᐊᓲᑎᖃᕐᐸᒻᒪᑕ ᑲᔪᓯᑎᑦᑎᑦᑎᐊᖃᑦᑕᕐᓂᖏᓐᓂᒃ ᑭᒃᑯᑐᐃᓐᓇᐃᑦ ᐅᑭᐅᖅᑕᖅᑐᒥ. ᓵᓚᖃᐅᓯᐊᖅᑎᑦᑎᕙᑦᑐᑦ ᐃᓕᓴᕐᓯᔪᑦ ᐊᔾᔨᒌᙱᑐᒡᒍᑎᓂᑦ ᐱᓕᕆᖃᑎᒌᑉᐸᑦᑐᓂᑦ ᐊᒻᒪᓗ ᐱᔪᓐᓇᕐᓯᑎᑦᑎᕙᑦᑐᑎᒃ ᐊᐅᓚᔾᔭᐃᕙᑦᑐᓂᑦ ᐱᓕᕆᐊᔅᓴᓂᑦ ᒪᑯᓂᖓ ᐃᓕᓐᓂᐊᕐᓂᓕᕆᓂᕐᒨᖓᔪᓂᑦ, ᐋᓐᓂᐊᖅᑐᓕᕆᓂᕐᒨᖓᔪᓂᑦ ᐊᒻᒪᓗ ᒪᑭᒪᓂᕐᒨᖓᔪᓂᑦ. ᐊᕐᕌᒍᑕᒫᑦ, ᓵᓚᖃᐅᓯᐊᖅᑎᑦᑎᕙᑦᑐᑦ ᑐᓂᓯᕙᑦᑐᑦ: ᐊᑕᐅᓯᕐᒥᒃ $1 ᒥᓕᐊᓐᑦ ᓵᓚᖃᐅᓯᐊᔅᓴᓂᑦ, ᑎᓴᒪᓄᑦ ᑎᑭᐅᒪᔪᓂᑦ $500,000ᓂᑦ ᐊᑐᓂᑦ, ᐊᒻᒪᓗ ᑎᑭᐅᒪᔪᓂᑦ ᑎᓴᒪᐅᔪᙱᒐᖅᑐᓄᑦ ᓵᓚᖃᐅᓯᐊᔅᓴᓂᑦ ᑎᑭᐅᒪᔪᓂᑦ $100,000ᓄᑦ ᐊᑐᓂᑦ. ᓵᓚᖃᐅᓯᐊᖅᑎᑦᑎᕙᑦᑐᑦ ᓇᒻᒥᓂᕆᔭᐅᕗᑦ ᐊᐅᓚᑕᐅᕙᑦᑐᑎᓪᓗ ᐅᑭᐅᖅᑕᖅᑐᒥ−ᓯᕗᓕᖅᑕᐅᓪᓗᓂ ᓵᓚᖃᐅᓯᐊᖅᑎᑦᑎᕙᑦᑐᓄᑦ ᐃᑲᔫᑎᖃᖃᑦᑕᓂᕐᒧᑦ ᐸᐸᑦᑎᔨᓄᑦ ᐊᒻᒪᓗ ᐱᓕᕆᖃᑎᒌᖑᓪᓗᑎᒃ ᑖᒃᑯᐊ ᓄᓇᖃᖅᑐᑐᖃᐃᑦ ᑎᒥᐅᔪᑦ, ᒐᕙᒪᒃᑯᑦ, ᓴᓇᕕᓕᕆᔩᑦ, ᐃᑲᔪᖅᑎᐅᖃᑎᒌᑉᐸᑦᑐᑦ, ᐊᒻᒪᓗ ᐊᒥᓱᑦ ᐊᓯᖏᑦ ᑲᑐᔾᔨᖃᑕᐅᕙᑦᑐᑦ ᐅᑭᐅᖅᑕᖅᑐᒥ ᓯᕿᓂᕐᒥᐅᓂᓪᓗ.
ᑐᓴᕋᔅᓴᐅᑉ ᒥᔅᓵᓄᑦ ᑐᑭᓯᒋᐊᕐᕕᔅᓴᖅ:
ᐋᓕᓴᓐ ᒪᒃᓛᒃᓚᓐ
Arctic Inspiration Prize
613.316.3473
