ᐅᖓᑖᓃᑦᑐᓂᑦ $3 ᒥᓕᐊᓐ ᐱᓇᓱᐊᕋᔅᓴᐅᑎᓪᓗᒋᑦ, ᐅᑭᐅᖅᑕᖅᑐᒥ ᐊᔾᔪᒥᓇᖅᑐᓂᑦ ᓵᓚᖃᐅᓯᐊᖅᑎᑦᑎᕙᑦᑐᑦ ᓇᓗᓇᐃᕐᓯᕗᑦ ᑎᓴᒪᐅᔪᖅᑐᓂᑦ “ᐅᑭᐅᖅᑕᖅᑐᒥ, ᐅᑭᐅᖅᑕᖅᑐᒧᑦ” ᓵᓚᔅᓴᖅᑐᓂᑦ ᑕᒫᓂ 2022ᒥ ᓵᓚᖃᐅᓯᐊᔅᓴᓂᑦ. ᑖᒃᑯᐊ ᐊᔾᔨᒌᙱᑐᒡᒍᑏᑦ ᐊᖏᓂᖏᑦ ᐱᔾᔪᑎᖏᓪᓗ, ᐊᑐᓂᑦ ᐱᓕᕆᐊᔅᓴᑦ ᑕᑯᑎᑦᑎᔪᑦ ᐊᑯᓂᐊᓗᒃ ᐊᑑᑎᓯᒪᒍᓐᓇᕐᓂᖏᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓇᒥᓕᒫᖅ. ᐊᔾᔪᒥᓇᖅᑐᑦ, ᐱᔪᓐᓇᕐᓯᒍᑕᐅᓂᐊᖅᑐᑦ ᐊᒻᒪᓗ ᖁᕕᐊᓲᑎᖃᕐᓂᐊᖅᑐᑦ ᐅᑭᐅᖅᑕᖅᑐᒥᐅᑦ ᐊᔪᙱᓐᓂᐊᓗᖏᓐᓂᒃ ᐊᒻᒪᓗ ᓄᑖᓂᑦ ᐊᑐᖅᑕᐅᖃᑦᑕᕈᓐᓇᖅᑐᓂᑦ, ᓵᓚᖃᐅᓯᐊᖅᑎᑦᑎᕙᑦᑐᑦ ᐊᖏᓂᕐᐹᖑᓪᓗᓂ ᐊᕐᕌᒍᑕᒫᑦ ᓵᓚᖃᐅᓯᐊᖅᑎᑦᑎᒍᑕᐅᕙᒻᒪᑦ ᑲᓇᑕᒥ.
“ᐱᔾᔪᑎᒋᓪᓗᒋᑦ ᐅᑭᐅᖅᑕᖅᑐᒥ ᐊᔾᔪᒥᓇᖅᑐᓄᑦ ᓵᓚᖃᐅᓯᐊᖅᑎᑦᑎᕙᑦᑐᑦ ᐃᑲᔫᑎᓂᑦ ᐸᐸᑦᑎᔩᑦ ᐊᒻᒪᓗ ᓄᓇᓕᓐᓂᑦ ᓇᒻᒥᓂᖃᖃᑕᐅᔪᑦ, ᑲᑐᔾᔨᖃᑕᐅᕙᑦᑐᑦ ᐃᑲᔪᖅᑎᐅᕙᑦᑐᓪᓗ, ᖁᕕᐊᒃᑯᑎᕙᕗᑦ ᐊᑐᓂᑦ ᓵᓚᔅᓴᖃᑕᐅᔪᑦ,” ᐅᖃᖅᑐᖅ ᐅᐊᓕ ᓲᒪᓐ, ᐃᔅᓯᕙᐅᑕᖓᑦ ᐅᑭᐅᖅᑕᖅᑐᒥ ᐊᔾᔪᒥᓇᖅᑐᓄᑦ ᓵᓚᖃᐅᓯᐊᖅᑎᑦᑎᕙᑦᑐᓄᑦ ᐃᑲᔪᖅᑎᐅᓂᕐᒧᑦ ᐸᐸᑦᑎᔨᖏᓐᓂᑦ “ᖁᕕᐊᓱᓪᓚᕆᑦᑐᖓ ᑕᑯᔭᕆᐊᔅᓴᖅ ᓄᑖᓂᑦ ᐊᑐᖅᑕᐅᓂᐊᖅᑐᓂᑦ ᐊᒻᒪᓗ ᓴᓇᑐᓂᖏᓐᓂᒃ ᐊᑐᓂᑦ ᑖᒃᑯᐊ ᐱᓕᕆᖃᑎᒌᑦ ᐃᒻᒧᐊᓅᖅᑎᓪᓗᒋᑦ ᑕᑯᔭᐅᓂᐊᕐᖓᑕ ᓇᔫᑎᓗᑕ ᖁᕕᐊᓲᑎᖃᕐᓂᐊᑎᓪᓗᑕ ᕖᕝᕗᐊᓕᐅᓕᖅᑲᑦ ᐃᓚᒋᔭᐅᓗᓂ ᐊᖅᓴᕐᓃᑦ ᐃᖅᑲᓇᐃᔭᕐᕕᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᓴᖅᑭᔮᖅᑎᑦᑎᓂᐅᓛᖅᑐᒥ. ᑖᒃᑯᐊ ᐱᓕᕆᖃᑎᒌᑦ ᑭᒡᒐᖅᑐᐃᒻᒪᑕ ᓂᕆᐅᒋᔭᐅᓯᒪᔪᓂᑦ ᑲᔪᓯᑎᑕᐅᒍᒪᓯᒪᔪᓂᓪᓗ ᐃᓱᒪᓇᑐᐃᓐᓇᕐᓯᒪᔪᓂᑦ ᓄᓇᓕᖏᓐᓂ ᐊᒻᒪᓗ ᖁᕕᐊᓱᑦᑎᐊᖅᑐᖓ ᖁᕕᐊᓲᑎᒋᔪᓐᓇᕐᓂᐊᕋᑦᑎᒍ ᓄᓇᖅᑲᑎᒌᖑᓗᑕ, ᑲᑐᔾᔨᖃᑎᒌᒃᑲᓗᕐᓗᑕ ᓱᓕ.”
$1 ᒥᓕᐊᓐᓄᑦ ᓵᓚᒃᓴᖅᑐᑦ:
ᑰᒐᓚᒃ
ᐱᓕᕆᖃᑎᒌᓄᑦ ᓯᕗᓕᖅᓯᔪᖅ: ᐄᒪᓕ ᐊᖑᓛᓕᒃ
ᓄᓇᓕᓐᓂᑦ: ᐃᖃᓗᒃᑑᑦᑎᐊᖅ, ᓄᓇᕗᑦ (ᐅᖓᑖᓂᓗ)
ᑰᒐᓚᒃ ᐱᔾᔪᑎᓕᒃ ᐋᖅᑭᔅᓱᐃᓂᕐᒥᒃ ᐋᖅᑭᓱᕐᓯᒪᓪᓚᕆᑦᑐᒥᒃ ᐅᖃᐅᓯᓕᕆᓂᕐᒥᒃ ᐃᓕᓐᓂᐊᕐᕕᔅᓴᒥᒃ ᐃᖃᓗᒃᑑᑦᑎᐊᕐᒥ, ᑲᑎᓯᒪᓗᑎᒃ ᐃᓪᓘᑉ ᐃᓗᐊᓂ ᓯᓚᒥᓗ ᐃᓕᖅᑯᓯᓕᕆᖃᑦᑕᕐᓂᖅ, ᓄᓇᓕᓐᓄᑦ−ᐋᖅᑭᓱᖅᑕᐅᓯᒪᓗᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᔾᔪᑎᔅᓴᐃᑦ, ᐊᒻᒪᓗ ᖃᐅᔨᓴᐅᑎᖃᕐᓗᑎᒃ ᓄᓇᐅᑉ ᓴᓇᓯᒪᓂᖓᓂᒃ ᐋᖅᑭᔅᓱᐃᓂᕐᒥᒃ ᐊᕙᑎᑦᑎᓃᙶᖅᑐᓂᑦ ᐆᒻᒪᖅᑯᑎᖃᕐᓂᕐᒥᒃ ᖃᐅᔨᓴᕐᓂᕐᒥᒃ ᐊᑐᕐᓗᑎᒃ ᐱᕈᖅᑐᓂᑦ ᓄᓇᓕᓐᓂᑦ ᐱᕈᖅᑐᖁᑎᖏᓐᓂᒃ ᓯᓚᒧᑦ ᒪᓕᑦᑐᓂᒃ ᐋᖅᑭᓱᕐᓯᒪᓗᒋᑦ, ᐱᕈᐃᔾᔪᑎᔅᓴᓂᑦ, ᐊᒻᒪᓗ ᐃᓕᖅᑯᓯᖅᑎᒍᑦ ᐊᑐᖅᑕᐅᔪᓐᓇᕐᓂᖏᓐᓂᒃ. ᐱᓕᕆᕕᐅᔪᓐᓇᕐᓗᓂ ᐃᓱᒪᕐᓱᕐᓗᑎᒃ ᑭᒃᑯᑐᐃᓐᓇᐃᑦ ᐃᓄᐃᑦ ᓄᓇᓖᓪᓗ ᖃᐅᔨᒪᓂᐊᓗᖏᓐᓂᒃ ᐱᓯᒪᔪᓂᑦ ᐊᑐᕐᓗᑎᒃ ᓄᑖᓂᑦ ᐊᑐᖅᑕᐅᔪᓐᓇᖅᑐᓂᑦ.
ᐱᓕᒻᒪᒃᓴᐃᔪᓕᕆᓂᖅ ᐱᓕᕆᐊᔅᓴᖅ
ᐱᓕᕆᖃᑎᒌᓄᑦ ᓯᕗᓕᖅᓯᔪᖅ: ᐊᐃᑐᕆᐊᓇ ᑯᓱᒐᖅ
ᓄᓇᓕᓐᓂᑦ: ᐃᓄᐃᑦ ᓄᓇᖓᑦ (ᐃᓄᕕᐊᓗᐃᑦ ᓄᓇᖓ, ᓄᓇᕕᒃ, ᓄᓇᑦᓯᐊᕗᑦ)
ᐃᓱᒪᓕᕆᓂᕐᒧᑦ ᐃᓅᓯᓕᕆᓂᕐᒧᓪᓗ ᑐᐊᕕᕐᓇᕐᓯᕙᓪᓕᐊᓂᖓ ᐃᓄᐃᑦ ᓄᓇᖓᓐᓂ ᓇᒥᓕᒫᖅ ᑐᑭᓯᐅᒪᔭᐅᑦᑎᐊᕐᖓᑦ ᑭᒃᑯᑐᐃᓐᓇᕐᓂᑦ ᐋᓐᓂᐊᖅᑐᓕᕆᖃᑦᑕᓂᕐᒥᒃ ᐃᓱᒫᓗᓇᕐᓂᖓᓂᒃ ᐱᒋᐊᕈᑎᖃᕐᓯᒪᓪᓗᑎᒃ ᑎᑭᕋᕐᓯᒪᔪᓄᑦ ᐊᐅᓚᑕᐅᓕᕐᓯᒪᓂᖏᓐᓄᑦ. ᐃᓕᑕᖅᓯᓂᒃᑯᑦ ᐱᓕᒻᒪᒃᓴᐃᔪᓕᕆᓂᕐᒧᑦ ᐱᓕᕆᐊᖓᑦ ᐃᓄᓐᓄᑦ−ᐋᖅᑭᓱᖅᑕᐅᓯᒪᓪᓗᓂ, ᐃᓄᓐᓄᑦ−ᑐᑭᒧᐊᑦᑎᑕᐅᓪᓗᓂ ᐱᓇᓱᐊᕈᑕᐅᒻᒪᑦ ᐋᖅᑭᓱᖅᑕᐅᓯᒪᔪᖅ ᑭᐅᔾᔪᑎᖃᖅᑐᑎᒃ ᑲᓴᑕᒥ ᐃᓄᐃᑦ ᐃᓅᓯᕐᒥᒃ ᑭᐱᓯᖃᑦᑕᖁᔨᙱᓂᕐᒧᑦ ᐸᕐᓇᐅᑎᖓᓐᓂᒃ, ᐃᓅᓯᕗᑦ ᐊᓐᓂᓇᖅᑐᑦ ᓄᓇᕗᒥ ᐃᓅᓯᕐᒥᒃ ᑭᐱᓯᖃᑦᑕᖁᔨᙱᓂᕐᒧᑦ ᐸᕐᓇᐅᑎᖓᓐᓄᑦ, ᐊᒻᒪᓗ ᐊᓕᐊᓇᐃᑦ ᐃᓄᐃᑦ ᐃᓱᒪᓕᕆᓂᕐᒧᑦ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓄᑦ. ᐃᓕᑕᖅᓯᓂᒃᑯᑦ ᐱᓕᒻᒪᒃᓴᐃᔪᓕᕆᓂᕐᒧᑦ ᐱᓕᕆᐊᖓᑦ ᑐᔅᓯᕋᐅᑎᖃᕐᓯᒪᔪᑦ ᐋᖅᑭᔅᓱᐃᕙᓪᓕᐊᔪᒪᓪᓗᑎᒃ ᐃᓚᓕᐅᑎᓂᐊᖅᑐᓂᑦ ᐃᓱᒪᓕᕆᓂᕐᒧᑦ ᖃᓄᖅᑑᕈᑕᐅᕙᑦᑐᓂᑦ ᐊᒻᒪᓗ ᐃᓄᓐᓂᑦ ᐃᓅᓯᖃᑦᑎᐊᓂᕐᒧᑦ ᐱᖅᑯᓯᖅᑎᒍᑦ ᐃᓕᓴᐃᔾᔪᑎᓂᑦ ᐱᓕᕆᐊᕆᕙᑦᑕᑎᓐᓄᑦ ᐃᑲᔫᑎᖃᕐᓂᐊᕐᖓᑕ ᓄᓇᖅᑲᑎᑦᑎᓐᓄᑦ ᐱᔨᑦᑎᕋᐅᑎᖃᕐᐸᑦᑐᓂᑦ ᓄᓇᓕᓐᓃᑦᑐᓂᑦ ᐱᓕᕆᐊᓂᑦ ᓇᒥᑐᐃᓐᓇᓕᒫᖅ ᐃᓄᐃᑦ ᓄᓇᖓᓐᓂ. ᑕᒪᒃᑯᐊ ᐃᑲᔫᑎᖃᕐᓂᐊᖅᑐᑦ ᓄᓇᓕᓐᓂᑦ ᐋᖅᑭᔅᓱᐃᔨᐅᕙᑦᑐᓄᑦ, ᓄᓇᓕᓐᓂᑦ ᓯᕗᓕᕐᓯᕙᑦᑐᓄᑦ, ᐊᑭᓴᖅᑐᐃᔨᐅᕙᑦᑐᓄᑦ ᐊᒻᒪᓗ ᐃᓕᓐᓂᐊᑎᑦᑎᕙᑦᑐᓄᑦ ᓄᓇᓕᓐᓂᑦ ᐱᓕᕆᐊᖃᕐᐸᑦᑐᓂᑦ ᐃᓄᐃᑦ ᓄᓇᖓᓐᓂᑦ ᓇᒥᓕᒫᖅ, ᑐᕌᒐᖃᖅᑐᑎᒃ ᐊᑐᓯᓂᕐᒥᒃ, ᓴᐳᔾᔨᓂᕐᒥᒃ ᐋᖅᑭᔅᓱᐃᕙᓪᓕᐊᓂᕐᒥᓪᓗ ᐊᓐᓇᐅᒪᔪᓐᓇᓂᕐᒥᒃ ᒪᑭᑕᒋᐊᒃᑲᓐᓂᖃᑦᑕᖁᓪᓗᒋᑦ ᐃᓘᓐᓇᑎᒃ ᓄᓇᖅᑲᑎᒋᔭᐅᔪᓕᒫᑦ.
ᓵᓚᖃᐅᓯᐊᖅᑎᑦᑎᕙᑦᑐᓂᑦ ᓯᕗᓪᓕᕐᐹᖑᓪᓗᑎᒃ (ᑎᑭᐅᒪᔪᓂᑦ $500,000) ᓵᓚᓖᑦ
ᐃᓕᓐᓂᐊᕈᑏᑦ ᐃᓐᓇᕆᔭᑦᑎᓐᓂᒃ
ᐱᓕᕆᖃᑎᒌᓂᑦ ᓯᕗᓕᖅᓯᔪᖅ: ᓯᐅᕋᓐ ᓯᓅᓲ
ᓄᓇᓕᓐᓂᑦ:ᓄᓇᑦᓯᐊᖅ
ᐃᓕᓐᓂᐊᕈᑏᑦ ᐃᓐᓇᕆᔭᑦᑎᓐᓂᒃ ᑐᔅᓯᕋᐅᑎᖃᕐᓯᒪᔪᑦ ᐃᓚᒋᔭᐅᑎᑦᑎᖃᑦᑕᕈᒪᓪᓗᑎᒃ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᓂᑦ ᑐᑭᓯᓇᓱᐊᕐᓂᕐᒥᒃ ᑕᐃᔅᓱᒪᓂᓴᕐᓂᑦ ᐱᖁᑎᓂᑦ ᐅᓂᒃᑳᕈᑕᐅᓯᒪᔪᓂᑦ ᓄᓇᓕᓐᓂᑦ ᐃᓐᓇᕆᔭᐅᔪᓂᑦ. ᐃᓅᓱᑦᑐᐃᑦ ᐱᕕᖃᕋᔭᕐᖓᑕ ᐊᐅᓪᓚᕈᓐᓇᕐᓯᓗᑎᒃ ᑕᑯᔭᒐᖃᕐᕕᒻᒧᑦ ᐱᖁᑎᑕᓕᓐᓂᑦ ᑕᐃᒃᑯᓂᖓ, ᑕᑯᓗᑎᒃ ᖃᓄᑎᒋᒃ 3D ᐱᖓᓱᐃᓕᖅᑲᖓᔪᒥᒃ ᐊᔾᔨᓕᐅᕆᓂᖅ ᐊᑐᖅᑕᐅᔪᓐᓇᕐᒪᖔᑕ ᐋᖅᑭᔅᓱᐃᒍᑕᐅᓗᑎᒃ ᖃᕋᓴᐅᔭᖅᑎᒍᑦ ᓇᓕᖅᑲᖏᓐᓂᒃ ᐱᖁᑏᑦ, ᐊᒻᒪᓗ ᐊᐱᖅᓱᕐᓗᑎᒃ ᐃᓐᓇᕐᒥᒃ, ᐅᓂᒃᑳᖅᑐᐊᖅᑎᒥᒃ ᐱᖁᑎᓂᒃ ᐋᖅᑭᔅᓱᐃᔪᓐᓇᖅᑐᒥᒃ ᐃᓕᖅᑯᓯᖏᓐᓅᖓᔪᓂᑦ. ᐱᓕᕆᖃᑎᖃᕐᓗᑎᒃ ᖁᓕᓂᑦ ᓄᓇᓕᐅᔪᓂᑦ ᐊᑕᐅᓯᕐᒥᒃ ᐊᕐᕌᒍᒥᒃ, ᑖᓐᓇ ᐱᓕᕆᐊᔅᓴᖅ ᑐᕌᒐᓕᒃ ᐋᖅᑭᔅᓱᐃᔾᔪᑕᐅᔪᒪᓪᓗᓂ ᖃᕋᓴᐅᔭᒃᑯᑦ ᑕᑯᔅᓴᐅᑎᑦᑎᒍᑕᐅᒐᔭᖅᑐᒥᒃ ᐱᖁᑎᓂᑦ ᐅᑭᐅᖅᑕᖅᑐᒥᐅᓄᑦ ᑕᑯᔭᐅᓚᐅᕐᓯᒪᒐᔭᙱᑎᐊᒻᒪᕆᑦᑐᒥᓂᕐᓂᑦ, ᐊᒻᒪᓗ ᐅᓂᒃᑳᓂᑦ ᐅᑭᐅᖅᑕᖅᑐᒥᐅᓕᒫᐸᓗᓐᓄᑦ ᑐᓵᔭᐅᓚᐅᕐᓯᒪᒐᔭᙱᑦᑐᓂᑦ.
ᓴᑕᓐ ᓈᔾᔨ: ᐋᖅᑭᐸᓪᓕᐊᓂᕐᒧᑦ ᐃᑲᔫᑎ
ᐱᓕᕆᖃᑎᒌᓂᑦ ᓯᕗᓕᖅᓯᔪᖅ: ᑕᐃᔮᓐ ᓯᑐᕌᓐ
ᓄᓇᓕᓐᓂᑦ: ᔫᑳᓐ
ᑭᖑᕚᕇᖑᔪᓂᑦ ᐅᖁᒪᐃᑦᑐᒃᑰᕈᑕᐅᓯᒪᔪᑦ ᐊᑦᑐᐃᓯᒪᓪᓚᕆᒻᒪᑕ ᐊᓪᓚᓂᑦ ᓄᓇᓕᐅᔪᓂᑦ. ᔫᑳᓐᒥ ᐃᓱᒪᓕᕆᕖᑦ ᐅᖃᕐᓯᒪᒻᒪᑕ ᑭᖑᓂᐊᒍᑦ−ᑲᒪᒋᔭᐅᖃᑦᑕᕆᐊᖃᕐᓂᖏᑦ ᐊᒻᒪᓗ ᐋᖅᑭᐸᓪᓕᐊᑎᓪᓗᒋᑦ ᐃᑲᔪᖅᑎᖃᖃᑦᑕᕆᐊᖃᕐᓂᖏᑦ ᑲᒪᒋᔭᒥᓂᐅᓚᐅᖅᑎᓪᓗᒋᑦ ᓯᕗᓪᓕᐅᔾᔭᐅᔭᕆᐊᖃᕐᖓᑦ. ᓵᑕᓐ ᓈᔾᔨ: ᐋᖅᑭᐸᓪᓕᐊᓂᕐᒧᑦ ᐃᑲᔫᑎ ᑐᕌᒐᓖᑦ ᑲᒪᒋᔭᖃᓪᓚᑦᑖᕐᓗᑎᒃ ᐊᒻᒪᓗ ᑲᔪᓰᓐᓇᖅᑐᒥᒃ ᑭᖑᓂᐊᒍᑦ ᑲᒪᒋᔭᐅᖃᑦᑕᖁᔨᓪᓗᑎᒃ ᐃᑲᔪᖅᑕᐅᓗᑎᒃ ᐸᓂᕐᓰᕕᓐᓃᓚᐅᖅᑎᓪᓗᒋᑦ. ᐊᕐᕌᒍᓕᒫᖅ ᐱᓕᕆᐊᖅ ᐊᑐᕈᑕᐅᖃᑦᑕᕋᔭᖅᑐᖅ ᐊᔾᔨᒌᙱᑦᑐᓂᑦ ᒪᒥᓴᕐᓂᕐᒨᖓᔪᓂᑦ ᐊᒻᒪᓗ ᐃᓚᖃᕋᔭᖅᑐᑎᒃ ᐆᒪᔪᓂᑦ ᐊᒻᒪᓗ ᓴᓇᐅᒐᕐᓂᑦ ᒪᒥᓴᐅᑎᖃᕐᓂᕐᒥᒃ, ᓄᒃᑭᓴᕐᓂᕐᒧᑦ ᑎᒥᒃᑯᓪᓗ ᒪᒥᓴᕐᓂᕐᒧᑦ, ᐅᖁᒪᐃᑦᑐᒃᑰᕈᑎᒋᓯᒪᔭᖏᓐᓂᒃ ᐊᒻᒪᓗ ᐊᑕᓗᐊᕐᓂᕐᒧᑦ ᒪᒥᓴᖃᑦᑕᓂᕐᒧᑦ, ᐊᒻᒪᓗ ᓄᓇᖃᖅᑳᖅᑐᓂᑦ ᑲᑎᒍᑕᐅᓲᓂᑦ, ᐱᖅᑯᓯᕐᓂᑦ ᐃᓱᒪᑐᓂᖏᓐᓂᓪᓗ ᐊᑐᕐᓗᑎᒃ. ᐱᖓᓱᓂᑦ−ᐊᕐᕌᒍᓂᑦ ᐃᑲᔪᕐᓂᕐᒧᑦ ᐱᓕᕆᐊᔅᓴᖅ ᐃᓚᖃᕐᓂᐊᖅᑐᖅ ᐱᓕᕆᔪᓐᓇᕐᓯᑎᑦᑎᕙᓪᓕᐊᓂᕐᒥᒃ ᔫᑳᓐᒥ ᓄᓇᖃᖅᑳᖅᑐᓂᑦ ᐃᓅᓯᓕᕆᓂᕐᒧᑦ ᐃᓅᓯᓕᕆᔨᓂᑦ, ᑲᒪᒋᔭᖃᓪᓚᑦᑖᕐᓗᑎᒃ ᐋᖅᑭᐊᓪᓕᐊᓂᕐᒧᑦ ᐃᑲᔫᑎᓂᑦ ᐊᒻᒪᓗ ᐊᑐᕐᓗᑎᒃ ᑲᑐᔾᔨᒍᑎᖃᕐᓂᕐᒥᒃ ᐃᓚᖃᕐᓗᓂ ᐃᓕᓐᓂᐊᑎᑦᑎᖃᑦᑕᓂᕐᒥᒃ ᐃᓕᓴᐃᔨᐅᒍᓐᓇᓂᕐᒥᒃ ᐊᑐᓕᖅᑎᑦᑎᕙᓪᓕᐊᓂᕐᒥᒃ.
ᐊᑕᓐᓂᐅᕕᒃ
ᐱᓕᕆᖃᑎᒌᓂᑦ ᓯᕗᓕᖅᓯᔪᖅ: ᐊᓖᓯᐊ ᐃᖃᓪᓗᒃ
ᓄᓇᓕᓐᓂᑦ: ᓄᓇᕕᒃ
ᓄᓇᕕᒻᒥ ᑲᑐᔾᔨᖃᑎᒌᑦ ᓄᓇᓕᐅᔪᓪᓗ ᑲᑎᓯᒪᒻᒪᑕ ᐋᖅᑮᓂᐊᕐᖓᑕ ᓄᑖᕐᒥᒃ, ᐋᖅᑭᓱᖅᑕᐅᓯᒪᔪᒥᒃ ᓄᓇᕕᒻᒥ ᖃᐅᔨᓴᖅᑐᓕᕆᓂᕐᒧᑦ ᐊᐅᓚᑦᑎᓂᕐᒥᒃ ᑎᒥᐅᔪᒥᒃ, ᐊᑎᖃᖅᑐᒥᒃ ᐊᑕᓐᓂᐅᕕᒃ, ᐊᑦᑎᖅᑕᐅᓯᒪᔪᖅ ᐊᑕᓐᓂᐅᕕᒻᒥᒃ, ᓯᕗᒧᐊᑦᑎᑦᑎᒍᑕᐅᓂᐊᖅᑐᒥᒃ ᓄᓇᕕᒻᒥ ᐃᓄᐃᑦ ᓇᒻᒥᓂᕐᓱᕈᓐᓇᕐᓂᖏᓐᓂᒃ ᖃᐅᔨᓴᖅᑐᓕᕆᓂᕐᒥᒃ. ᓄᓇᕕᒃ ᑖᓐᓇ ᐃᓄᐃᑦ ᓄᓇᖓᓐᓂ ᑕᒫᓂ ᖃᐅᔨᓴᖅᑐᓕᕆᓂᕐᒧᑦ ᐊᖏᖅᑕᐅᕕᒋᔪᓐᓇᖅᑕᖓᓂ ᐃᓂᖃᙱᑐᑑᒻᒪᑦ. ᑖᓐᓇ ᐱᓕᕆᐊᔅᓴᖅ ᐱᔾᔪᑎᖃᓗᐊᕐᓂᐊᖅᑐᖅ ᐋᖅᑭᔅᓱᐃᕙᓪᓕᐊᓂᕐᒥᒃ ᑭᒃᑯᑐᐃᓐᓇᐃᑦ ᐱᓕᕆᔪᓐᓇᕐᓂᖏᓐᓂᒃ ᐃᒻᒧᐊᓂ ᐊᑕᓐᓂᐅᕕᒃ ᐊᐅᓚᓂᖏᓐᓂ, ᐃᓚᒋᔭᐅᓪᓗᑎᒃ ᖃᐅᔨᒪᒋᐊᑦᑎᐊᕐᓂᖅ ᐊᑕᓐᓂᐅᕕᒃ ᐊᐅᓚᑕᐅᒐᓗᐊᕐᒪᖔᖅ ᐃᓄᓐᓄᑦ ᐊᒻᒪᓗ ᐃᓐᓄᓐᓄᑦ ᑐᕌᖓᓪᓗᓂ. ᓵᓚᖃᐅᓯᐊᖅᑎᑦᑎᕙᑦᑐᑦ ᐱᓕᕆᐊᖓᑦ ᐊᑑᑎᖃᓪᓚᕆᒻᒪᑦ ᑲᔪᓯᓂᖃᑦᑎᐊᖁᓪᓗᒍ ᐊᑕᓐᓂᐅᕕᒃ, ᑭᓯᐊᓂ ᐱᕈᕐᐸᓪᓕᐊᑎᑦᑎᓂᖅ ᓄᓇᕕᒻᒥ ᐱᓕᕆᔪᓐᓇᕐᓂᖏᓐᓂᒃ ᐊᐅᓚᑦᑎᓂᕐᒥᒃ ᖃᐅᔨᓴᖅᑐᓕᕆᓂᕐᒥᒃ ᐊᖏᔪᒥᒃ ᓯᕕᑐᔪᒨᖓᔪᒥᒃ ᐱᕚᓪᓕᕈᑎᖃᖅᑎᑦᑎᓂᐊᖅᑐᖅ ᑎᑭᐅᒪᔪᒥᒃ ᐅᖓᑖᓄᑦ ᑖᔅᓱᒪ ᐱᓕᕆᐊᔅᓴᐅᑉ.
ᐃᓅᓱᑦᑐᓂᑦ ᓯᕗᓪᓕᕐᐹᖑᓪᓗᑎᒃ (ᑎᑭᐅᒪᔪᓂᑦ $100,000) ᓵᓚᔅᓴᖅᑐᑦ:
N’’tsaÜw Chu’ Kedts’edán Kù ᐱᖅᑯᓯᖅᑎᒍᑦ ᐊᐅᓪᓚᕐᓯᒪᓂᖅ
ᐱᓕᕆᖃᑎᒌᓂᑦ ᓯᕗᓕᖅᓯᔪᖅ: ᐋᓕᕝ ᒧᐊᓚᓐ
ᓄᓇᓕᓐᓂᑦ: ᕙᐃᑦHᐅᐊᔅ, ᔫᑳᓐ
N’’tsaÜw Chu’ Kedts’edán Kù ᐱᖅᑯᓯᖅᑎᒍᑦ ᐊᐅᓪᓚᕐᓯᒪᓂᖅ ᑐᕌᒐᓖᑦ ᐋᖅᑭᔅᓱᐃᔪᒪᓪᓗᑎᒃ ᐱᖅᑯᓯᖅᑎᒍᑦ ᐊᐅᓪᓚᕐᓯᒪᓂᐅᖃᑦᑕᓂᐊᖅᑐᒥᒃ ᐳᐊᑕ ᑯᕇᒃ ᐃᓕᓐᓂᐊᕐᕕᐊᓗᒻᒥ (PCSS), ᐃᑲᔪᖅᑐᑎᒃ ᐃᓕᓴᕕᒻᒥ ᐊᒻᒪᓗ ᓄᓇᓕᓐᓂᑦ ᐃᓚᒋᔭᐅᖃᑦᑕᖁᓪᓗᒋᑦ ᐃᓕᖅᑯᓯᓕᕆᓂᕐᒥᒃ. ᐊᐅᓪᓚᕐᓯᒪᓂᖅ ᐱᓕᕆᔪᓐᓇᕐᓯᒍᑕᕙᓪᓕᐊᓂᐊᕐᖓᑦ ᐃᓕᓴᐃᔨᓄᑦ ᐊᒻᒪᓗ ᐃᑲᔪᕐᓗᑎᒃ ᐃᓕᓐᓂᐊᖅᑎᓂᑦ ᑕᑯᑎᑦᑎᓂᕐᒥᒃ ᓇᒻᒥᓂᖅ ᐊᒻᒪᓗ ᐃᓕᖅᑯᓯᖅᑎᒍᑦ ᐃᓕᓴᐃᔾᔪᓯᕐᓂᑦ ᐊᑑᑎᖃᕐᓂᖏᓐᓂᒃ. ᐊᓯᖏᓪᓕ ᐃᓕᓴᕖᑦ ᐃᒐᕕᖃᐅᖃᑦᑕᕐᖓᑕ ᐊᒻᒪᓗ ᓯᓚᒥ ᐃᓕᓐᓂᐊᑎᑦᑎᕕᖃᕐᐸᑦᑐᑎᒃ, ᐊᓯᖏᓐᓂᑦ ᐃᓕᓴᕕᓐᓂᑦ ᕙᐃᑦHᐅᐊᔅᒥ ᑕᐃᒪᐃᑦᑐᖅᑕᖃᙱᒻᒪᑦ ᐊᒻᒪᓗ ᐸᕐᓇᓯᒪᓪᓗᑎᒃ ᐋᖅᑭᔅᓱᐃᔪᒪᓪᓗᑎᒃ ᐃᓕᖅᑯᓯᓕᕆᕕᔅᓴᒥᒃ PCSS ᐃᓕᓐᓂᐊᑎᑦᑎᕕᒋᔪᓐᓇᖅᑕᖓᓐᓂᒃ ᑖᓐᓇ ᐱᖅᑯᓯᖅᑎᒍᑦ ᐊᐅᓪᓚᕐᓯᒪᑎᑦᑎᖃᑦᑕᓂᕐᒧᑦ ᐱᔭᕇᖅᑕᐅᑉᐸᑦ.
ᐅᑭᐅᖅᑕᖅᑐᒥ ᐱᙳᐊᕈᓰᑦ ᐃᓅᓱᑦᑐᓂᑦ ᐃᑲᔪᖅᑎᒌᑎᑦᑎᓂᖅ “ᐃᓄᕕᐊᓗᐃᑦ ᐱᐅᔭᐅᓯᖅ”
ᐱᓕᕆᖃᑎᒌᓂᑦ ᓯᕗᓕᖅᓯᔪᖅ: ᑕᒥᐅᕋ ᕙᐅᑐᕌᒃ
ᓄᓇᓕᓐᓂᑦ: ᐃᓄᕕᐊᓗᐃᑦ ᓄᓇᖓᓐᓂ
ᐅᐸᓗᖓᐃᔭᖅᑎᓪᓗᒋᑦ ᐊᖏᓂᕐᓴᒧᑦ ᐅᑭᐅᖅᑕᖅᑐᒥᐅᓂᑦ ᐱᙳᐊᓂᕐᒧᑦ ᐃᓅᕕᒻᒥ ᐊᒻᒪᓗ ᐃᓱᒪᒋᓪᓗᒋᑦ ᐃᓱᒪᓕᕆᓂᖅ ᐊᒻᒪᓗ ᐅᑉᐱᕐᓂᕐᒧᑦ ᑐᐊᕕᕐᓇᕐᓯᓯᒪᓂᖓ ᐊᒥᓱᓂᑦ ᐅᑭᐅᖅᑕᖅᑐᒥᐅᓂᑦ ᓄᓇᓕᓐᓂᑦ, ᐅᑭᐅᖅᑕᖅᑐᒥ ᐱᙳᐊᑎᑦᑎᓂᖅ ᐃᓅᓱᑦᑐᓂᑦ ᐃᑲᔪᖅᑎᒌᓪᓗᑎᒃ “ᐃᓄᕕᐊᓗᐃᑦ ᐱᐅᔭᐅᓯᖅ” ᑐᔅᓯᕋᐅᑎᓖᑦ ᐅᑭᐅᖅᑕᖅᑐᒥ ᐃᓅᓱᑦᑐᓂᑦ ᐱᕙᓪᓕᐊᑎᑦᑎᓂᕐᒧᑦ ᑐᒃᑑᔮᖅᑐᕐᒥ, ᐃᑲᔪᕐᓗᑎᒃ ᐋᖅᑭᔅᓱᐃᓂᕐᒥᒃ ᐱᕙᓪᓕᐊᑎᑦᑎᓂᕐᒥᓪᓗ ᑭᖑᓪᓕᐅᓂᐊᖅᑐᓂᑦ ᓯᕗᓕᖅᑎᓂᑦ ᐊᑐᖅᑎᑦᑎᒋᐊᒃᑲᓂᕐᓗᑎᒃ ᓈᒻᒪᑦᑐᒥᒃ ᐃᓅᓯᕐᒧᑦ ᐱᓕᕆᓂᐅᔪᒥᒃ ᐊᒻᒪᓗ ᐃᓕᖅᑯᓯᖅᑎᒍᑦ ᑲᓲᒪᖃᑎᒌᓐᓂᕐᒥᒃ ᐊᐅᓪᓗᔾᔨᓗᑎᒃ ᐊᔪᕆᕐᓯᐅᔾᔨᓂᕐᒥᒃ ᐃᓅᓱᑦᑐᓂᑦ ᐊᒻᒪᓗ ᐅᔾᔨᓇᕐᓯᑎᑦᑎᓂᕐᒥᒃ ᐃᑲᔪᖅᑎᐅᖃᑦᑕᕈᓐᓇᓂᕐᒥᒃ ᐊᑭᓕᕐᓱᖅᑕᐅᖏᓪᓗᓂ.
ᓄᓇᕗᒥ ᐃᓅᓱᑦᑐᐃᑦ ᓴᓇᑐᔪᑦ
ᐱᓕᕆᖃᑎᒌᓂᑦ ᓯᕗᓕᖅᓯᔪᖅ: ᒫᑭᓐᑖᔅ ᐸᐃᕕᐊ
ᓄᓇᓕᓐᓂᑦ: ᐃᖃᓗᐃᑦ, ᓄᓇᕗᑦ
ᒫᓐᓇ ᐊᒥᓲᙱᒻᒪᑕ ᖃᕋᓴᐅᔭᒃᑯᑦ ᐱᖁᑏᑦ ᐱᔾᔪᑎᓖᑦ ᐃᓄᓐᓂᑦ ᓄᓇᕗᒻᒥᐅᓂᑦ ᐊᒻᒪᓗ ᐃᓅᓯᖏᓐᓂᒃ. ᑖᒃᑯᐊ ᐊᒥᓲᙱᑦᑐᑦ ᓄᐊᑕᐅᓯᒪᔪᑦ ᖃᕋᓴᐅᔭᒃᑯᑦ ᐱᖁᑏᑦ ᐊᑐᖅᑕᐅᓪᓚᕆᖃᑦᑕᕐᖓᑕ, ᑕᐃᒫᓪᓗ ᑖᒃᑯᓂᖓᔅᓴᐃᓐᓇᖅ ᑕᑯᔾᔪᑕᐅᕙᑦᑐᑎᒃ ᐊᔾᔨᓂᑦ ᑕᐃᒪᙵᓕᒫᖅ ᑕᑯᔭᐅᓕᖅᑭᑦᑖᕙᑦᑐᑎᒃ ᓴᖅᑭᔮᕆᐊᒃᑲᓐᓂᕈᑎᐅᕙᑦᑐᑦ ᐃᓄᓐᓄᑦ ᑐᕌᖓᔪᑦ. ᓄᓇᕗᒻᒥ ᐃᓅᓱᑦᑐᐃᑦ ᓴᓇᑐᔪᑦ ᖃᐅᔨᓇᓱᒃᑲᔭᕐᒥᔪᑦ ᓄᓇᓕᓐᓂᑦ ᐃᖅᑲᓇᐃᔭᖅᑎᑦᑎᒍᒪᓪᓗᑎᒃ ᓴᓇᑐᔪᓂᑦ ᐃᓅᓱᑦᑐᓂᑦ ᓄᓇᓕᐅᔪᓂᑦ ᓇᓂᓯᒍᓐᓇᐸᙱᑦᑐᓂᑦ ᐊᑑᑎᓕᓐᓂᑦ ᐃᖅᑲᓇᐃᔮᔅᓴᓂᑦ ᓂᕈᐊᒐᕆᕙᑦᑕᖏᓐᓂᒃ ᓄᓇᖏᓐᓂᒃ ᕿᒪᐃᔭᕆᐊᑐᙱᓪᓗᑎᒃ.
ᑖᒃᑯᐊ ᐱᖓᓱᑦ ᐊᕕᑦᑐᕐᓯᒪᓂᐅᔪᓂᑦ ᓂᕈᐊᕐᓂᕐᒧᑦ ᑲᑎᒪᔨᕋᒫᑦ ᔫᑳᓐᒥ, ᓄᓇᑦᓯᐊᕐᒥ ᐊᒻᒪᓗ ᐃᓄᐃᑦ ᓄᓇᖓᓐᓂ, ᐅᑭᐅᖅᑕᖅᑐᒥᐅᑕᓂᑦ ᑭᒡᒐᖅᑐᐃᔪᑦ ᐊᔾᔨᒌᙱᑐᒡᒍᑎᓂᑦ ᓴᓇᕕᐅᕙᑦᑐᓂᑦ ᓄᓇᓕᐅᔪᓂᓪᓗ, ᕿᒥᕐᕈᓯᒪᔪᑦ ᐊᒻᒪᓗ ᓂᕈᐊᕐᓯᒪᔪᑦ ᓂᕈᐊᕋᔅᓴᓂᑦ ᓄᓇᖏᓐᓂᑦ. ᓂᕈᐊᖅᑕᐅᖁᒐᔭᖅᑕᖏᑦ ᐊᔾᔪᒥᓇᖅᑐᓂᑦ ᓵᓚᖃᐅᓯᐊᖅᑎᑦᑎᕙᑦᑐᓂᑦ ᑲᓇᑕᒥ ᓂᕈᐊᕐᓂᕐᒧᑦ ᑲᑎᒪᔨᕋᓛᓅᖅᑕᐅᒐᔭᖅᑐᑦ, ᑖᒃᑯᐊ ᓂᕈᐊᕋᔭᕐᖓᑕ ᓇᓗᓇᐃᕐᓯᓗᑎᓪᓗ ᑐᓂᔭᐅᓂᐊᖅᑐᓂᑦ ᓵᓚᖃᐅᓯᐊᖅᑎᑦᑎᕙᑦᑐᓂᑦ 11ᒋᓕᖅᑕᖓᓐᓂ ᐊᕐᕌᒍᑕᒫᑦ ᑐᓂᔭᐅᓂᐊᖅᑐᓂᑦ ᑲᑎᑎᑦᑎᓂᖓᓐᓂ, ᕖᕝᕗᐊᓕ 8, 2023ᒥ ᐋᑐᕚᒥ ᐊᑕᐅᑦᑎᒃᑯᑦ ᐊᖅᓴᕐᓃᑦ ᐃᖅᑲᓇᐃᔭᕐᕕᓐᓂᑦ ᐊᒻᒪᓗ ᐃᓕᖅᑯᓯᕐᓂᑦ ᓴᖅᑭᔮᖅᑎᑦᑎᓂᖃᖅᑎᓪᓗᒋᑦ.
ᐅᑭᐅᖅᑕᖅᑐᒥ ᐊᔾᔪᒥᓇᖅᑐᓂᑦ ᓵᓚᖃᐅᓯᐊᖅᑎᑦᑎᕙᑦᑐᑦ ᒥᔅᓵᓅᖓᔪᑦ
ᐊᖏᓂᕐᐹᒥᒃ ᐊᕐᕌᒍᑕᒫᑦ ᓵᓚᖃᐅᓯᐊᖅᑎᑦᑎᕙᑦᑐᑎᒃ ᑲᓇᑕᒥ, ᐅᑭᐅᖅᑕᖅᑐᒥ ᐊᔾᔪᒥᓇᖅᑐᓂᑦ ᓵᓚᖃᐅᓯᐊᖅᑎᑦᑎᕙᑦᑐᑦ (AIP) ᐱᔪᒐᕐᓴᐃᕙᒻᒪᑕ, ᐱᔪᓐᓇᕐᓯᑎᑦᑎᕙᒻᒪᑕ ᐊᒻᒪᓗ ᖁᕕᐊᓲᑎᖃᕐᐸᒻᒪᑕ ᑲᔪᓯᑎᑦᑎᑦᑎᐊᖃᑦᑕᕐᓂᖏᓐᓂᒃ ᑭᒃᑯᑐᐃᓐᓇᐃᑦ ᐅᑭᐅᖅᑕᖅᑐᒥ. ᓵᓚᖃᐅᓯᐊᖅᑎᑦᑎᕙᑦᑐᑦ ᐃᓕᓴᕐᓯᔪᑦ ᐊᔾᔨᒌᙱᑐᒡᒍᑎᓂᑦ ᐱᓕᕆᖃᑎᒌᑉᐸᑦᑐᓂᑦ ᐊᒻᒪᓗ ᐱᔪᓐᓇᕐᓯᑎᑦᑎᕙᑦᑐᑎᒃ ᐊᐅᓚᔾᔭᐃᕙᑦᑐᓂᑦ ᐱᓕᕆᐊᔅᓴᓂᑦ ᒪᑯᓂᖓ ᐃᓕᓐᓂᐊᕐᓂᓕᕆᓂᕐᒨᖓᔪᓂᑦ, ᐋᓐᓂᐊᖅᑐᓕᕆᓂᕐᒨᖓᔪᓂᑦ ᐊᒻᒪᓗ ᒪᑭᒪᓂᕐᒨᖓᔪᓂᑦ. ᐊᕐᕌᒍᑕᒫᑦ, ᓵᓚᖃᐅᓯᐊᖅᑎᑦᑎᕙᑦᑐᑦ ᑐᓂᓯᕙᑦᑐᑦ: ᐊᑕᐅᓯᕐᒥᒃ $1 ᒥᓕᐊᓐᑦ ᓵᓚᖃᐅᓯᐊᔅᓴᓂᑦ, ᑎᓴᒪᓄᑦ ᑎᑭᐅᒪᔪᓂᑦ $500,000ᓂᑦ ᐊᑐᓂᑦ, ᐊᒻᒪᓗ ᑎᑭᐅᒪᔪᓂᑦ ᑎᓴᒪᐅᔪᙱᒐᖅᑐᓄᑦ ᓵᓚᖃᐅᓯᐊᔅᓴᓂᑦ ᑎᑭᐅᒪᔪᓂᑦ $100,000ᓄᑦ ᐊᑐᓂᑦ. ᓵᓚᖃᐅᓯᐊᖅᑎᑦᑎᕙᑦᑐᑦ ᓇᒻᒥᓂᕆᔭᐅᕗᑦ ᐊᐅᓚᑕᐅᕙᑦᑐᑎᓪᓗ ᐅᑭᐅᖅᑕᖅᑐᒥ−ᓯᕗᓕᖅᑕᐅᓪᓗᓂ ᓵᓚᖃᐅᓯᐊᖅᑎᑦᑎᕙᑦᑐᓄᑦ ᐃᑲᔫᑎᖃᖃᑦᑕᓂᕐᒧᑦ ᐸᐸᑦᑎᔨᓄᑦ ᐊᒻᒪᓗ ᐱᓕᕆᖃᑎᒌᖑᓪᓗᑎᒃ ᑖᒃᑯᐊ ᓄᓇᖃᖅᑐᑐᖃᐃᑦ ᑎᒥᐅᔪᑦ, ᒐᕙᒪᒃᑯᑦ, ᓴᓇᕕᓕᕆᔩᑦ, ᐃᑲᔪᖅᑎᐅᖃᑎᒌᑉᐸᑦᑐᑦ, ᐊᒻᒪᓗ ᐊᒥᓱᑦ ᐊᓯᖏᑦ ᑲᑐᔾᔨᖃᑕᐅᕙᑦᑐᑦ ᐅᑭᐅᖅᑕᖅᑐᒥ ᓯᕿᓂᕐᒥᐅᓂᓪᓗ.
ᑐᓴᕋᔅᓴᐅᑉ ᒥᔅᓵᓄᑦ ᑐᑭᓯᒋᐊᕐᕕᔅᓴᖅ:
ᐋᓕᓴᓐ ᒪᒃᓛᒃᓚᓐ
Arctic Inspiration Prize
https://arcticinspirationprize.ca/wp-content/uploads/2022/03/©[email protected]
613.316.3473
ᐃᑭᐊᖅᑭᕕᒃ: arcticinspirationprize.ca
Twitter: @ArcticPrize
Facebook: /ArcticPrize
Instagram: @ArcticInspirationPrize
